اسرائیلی وزیرِ خارجہ زپی لیونی

اسرائیلی وزیرِ خارجہ زِپی لِونی کا کہنا ہے کہ اسرائیل کو فلسطینیوں کے ساتھ مذاکرات جاری رکھنے چاہئیں۔

اسرائیل کی نئی حکومت تشکیل دینے کے لیے نامزدگی کے بعد لِونی کا یہ بیان اتوار کے روز سامنے آیا جسے اُن کی پہلی پالیسی تقریر قرار دیا جا رہا ہے۔

اُنہوں نے کہا کہ وہ پُر عزم ہیں کہ  مذاکرات کے ذریعے ہی فلسطین کی ریاست کا قیام ممکن ہوگا، لیکن اُن کو شک ہے کہ رواں سال کے آخر تک امن معاہدہ طے پا جائے گا۔

لِونی نے یہ بھی کہا کہ بین الاقوامی کمیونٹی کو چاہیئے کہ ایران کا مقابلہ کریں نہ کہ اُسے خوش کرنے کی پالیسی پر عمل پیرا ہوں۔

توقع  کی جاتی ہےکہ اِس ہفتے ماسکو میں اسرائیلی وزیرِاعظم ایہود اولمرٹ روس پر زور دیں گے کہ وہ ایران اور شام کو جدید ہتھیار نہ بیچے۔

اسرائیل کو اِس بات کی تشویش ہے کہ روس ایران کو طیارہ شکن میزائل بیچ سکتا ہے۔