جیروم کورسی نیروبی کے ہوائی اڈے پر

کینیا کے حکام نے کہا ہے کہ وہ امریکی صدارتی امیدوار براک اوباما کی مخالفت میں لکھی گئی کتاب کے امریکی مصنف جیروم کورسی کو ملک بدر کر رہے ہیں۔ انھیں  آج صبح کینیا کے دارالحکومت نیروبی میں حراست میں لے لیا گیا تھا۔  کورسی پر الزام ہے کہ ان کی سفری دستاویزات درست نہیں ہیں۔

کورسی اپنی کتاب ’دی اوباما نیشن‘کی تقریبِ رونمائی کے سلسلے میں کینیا آئے ہوئے تھے۔ اس کتاب میں اوباما کے کردار اور صدارت کے عہدے کے لیے ان کی موزینیت پر سوال اٹھائے گئے ہیں۔

کورسی نے حال ہی میں کہا تھا کہ وہ اس کتاب میں اوباما اور کینیا کی حکومت کے درمیان خفیہ روابط کو طشت از بام کرنا چاہتے ہیں۔  انھوں نے کہا کہ اگر اوباما جیت گئے تو کینیا میں ایک خفیہ منصوبہ پایہٴ تکمیل تک پہنچایا جائے گا۔

اس سے پہلے کورسی نے صدارتی امیدوار جان کیری کے خلاف بھی کتاب لکھی تھی۔ کہا جاتا ہے کہ جارج بش کے مقابلے پر کیری کی شکست میں اس کتاب نے کردار ادا کیا تھا۔

اوباما کینیا میں بے حد مقبول ہیں۔ ان کے مرحوم والد کینیا کے شہری تھے۔