شعیب ملک کی قیادت میں پاکستان کی کرکٹ ٹیم جمعرات کے دن ٹورنٹو پہنچ گئی ہے جہاں وہ چار ملکی ٹوینٹی20 ٹورنامنٹ میں شرکت کرے گی۔

یہ ٹورنامنٹ دس اکتوبر سے ٹورنٹو سے منسلک شہر کنگ سٹی میں شروع ہو رہا ہے۔

پاکستان کے علاوہ سری لنکا، زمبابوے اور کینیڈا کی ٹیمیں بھی اِس ٹورنامنٹ میں حصہ لے رہی ہیں۔

نیٹ پریکٹس کے بغیر پاکستان کی ٹیم جمعے کے دِن اِس ٹورنامنٹ کا پہلا میچ میزبان ٹیم کینیڈا کے خلاف کھیل رہی ہے۔

کپتان شعیب ملک کا کہنا ہے کہ اُن کی ٹیم کو پریکٹس کی نہیں بلکہ لمبے سفر کے بعد آرام کی ضرورت ہے۔

کینیڈا میں آمد کے موقع پر اخبار نویسوں سے بات چیت کرتے ہوئے شعیب ملک نے کہا کہ اُن کی ٹیم اِس ٹورنامنٹ کو جیتنے کی صلاحیت رکھتی ہے۔

شعیب ملک نے یہ بھی کہا کہ کھلاڑیوں کا آپس میں کسی قسم کا کوئی اختلاف نہیں ہے۔