اس رپورٹ کی ویڈیو

اقوام متحدہ کی رپوٹس کے مطابق ہر سال دنیا بھر میں پانچ ہزار خواتین ، غیرت کے نام پر اپنے گھروالوں کے ہاتھوں موت کے گھاٹ اتار دی جاتی ہیں۔ ایسے واقعات زیادہ تر مشرق وسطی ، جنوبی ایشیا اور شمالی افریقہ جیسے روایتی معاشروں میں پیش آتے ہیں مگر اکا دکا ایسے واقعات مغرب میں بھی ہوتے ہیں۔

پاکستان کے صوبہ سندھ اورپنجاب کے جنوبی اضلاع میں غیر ت کے نام پر قتل کے واقعات عام ہیں اور حکومت کے تعزیری اقدامات کے باوجود ان میں کوئی خاص کمی دیکھنے میں نہیں آئی ۔

سماجیات کے ماہرین کا کہنا ہے کہ قبائلی دور کی اس قدیم اور قبیح رسم کو ختم کرنے کے لیے حکومتی سطح پر سخت اقدامات کے ساتھ ساتھ، ان علاقوں میں تعلیم کی سہولتوں میں اضافے اور روزگار کی فراہمی کی ضرورت ہے۔ اس کے علاوہ سماجی کارکنوں کو لوگوں میں شعور بیدار کرنے کے لیے اپنا کردار ادا کرنا چاہیے۔ معاشرتی نظام میں بنیادی تبدیلیاں لا کر ہی غیرت کے نام پر قتل کے واقعات میں کمی لائی جا سکتی ہے۔