اس رپورٹ کی ویڈیو

دنیابھرمیں ہرسال آٹھ مارچ ’’عالمی یوم نسواں‘‘کے طورپرمنایا جاتا ہے۔اس سلسلے میں دنیا بھرمیں تقریبات بھی منعقد کی جاتی ہیں خواتین کے حقوق اورانہیں انصاف مہیا کرنے کے عہد بھی کئےجاتے ہیں۔اس سال اقوام متحدہ کی طرف سے خواتین کے عالمی دن کا تھیم ہے ترقی کی جانب سفر ۔ اقوام متحدہ کی جانب 1975 خواتین کے عالمی سال کے طور پر منایا گیا اور اس کے بعد سے ہر سال آٹھ مارچ کو خواتین کا عالمی دن دنیا بھرمیں منایا جاتا ہے۔

امریکی وزارت خارجہ کی اینڈری باٹنر کا کہنا ہے کہ ہمیں چاہیے کہ اس دن ہم ان نمایاں کاموں کو سراہیں جو خواتین نے سرانجام دیے ہیں۔ میرا تجربہ کہتا ہے کہ مستقبل میں خواتین اپنی کامیابیوں سے اپنے لیے ایک منفرد مقام بنائیں گی۔ اگر آپ خواتین راہنماؤں اور لڑکیوں کو تربیت دیں گے تو وہ ضرور کامیاب لیڈر بنیں گیں اوراس سے معاشرے میں تبدیلی آئے گی۔

لنڈا کریمر کا کہنا ہے کہ اگر ہم مختلف ممالک پر نظر ڈالیں تو شائد ہی کوئی ایسا شعبہ ہو جہاں ہمیں خواتین مردوں کے شانہ بشانہ کام کرتی ہوئی نظر نہ آئیں۔ خواتین جو چاہیں کرسکتی ہیں۔خواتین کے عالمی کے دن کے موقع پرمیرا یہی پیغام ہے۔مجھے یہ دیکھ کر خوشی ہوتی ہے کہ آج کی عورت کتنی دلجمعی اور لگن سے دنیا میں بہتری لانے کے لئے کام کررہی ہے۔

ریم عبدالحسن کا کہنا ہے کہ خواتین کے عالمی دن کی اہمیت اس حوالے سے ہے کہ دنیا بھر کی خواتین کو ایک طرح کے ہی چیلنجز اور مشکلات کا سامناہے اور وہ اس کے لئے جدوجہد بھی کررہی ہیں۔ یہ دن ہمیں یہ پیغام دیتا ہے کہ دنیا بھر کی خواتین کو متحد ہوکر اس بات پر یقین رکھیں کہ اس دنیا میں کچھ ناممکن نہیں۔ہمیں اب اس بارے میں کام کرنا ہے ہماری بچیوں کو وہ مساوی حقوق مل سکیں جن کی ہم خواہش کرتے ہیں۔

بعض مبصرین کہتےہیں کہ پاکستان سمیت دنیاکے اسلامی ممالک اوربالخصوص تیسری دنیا کے ممالک میں خواتین کومردوں کے برابرحقوق ملنے میں توشاید اب بھی کئی برس لگ جائیں لیکن انہیں اگر بروقت طبی سہولیات اورعدالتوں سے فوری انصاف مل جائےتو یہ بھی ایک بڑا معجزہ ہوگا۔