کراچی میٹروپولٹن کارپوریشن کے میئر سید مصطفیٰ کمال نے وائس آف امریکہ کے ساتھ اپنے ایک انٹرویو میں کہا ہے کہ شہر کی ترقی کے لیے شروع کیے جانے والے کئی ترقیاتی پراجیکٹس مکمل ہوچکے ہیں جس سے سڑکوں کی حالت بہتر ہوئی ہے اور آمدو رفت کی سہولتوں میں اضافہ ہوا ہے۔ شہر کی صفائی ، پانی کی فراہمی اور دیگر بنیادی ضرورتوں کی فراہمی کے بھی کئی منصوبے مکمل کرلیے گئے ہیں اور کئی ایک پر کام جاری ہے۔

کراچی میٹروپولٹن کارپوریشن کے میئرمصطفیٰ کمال جو ان دنوں امریکہ آئے ہوئے ہیں،اپنے انٹرویو کے لیے خصوصی طور پر وائس آف امریکہ کے اسٹوڈیوز میں آئے۔ انڈر گراؤنڈ ریلولے اور دوسرے زیر التواء منصوبوں کے بارے میں ان کا کہناتھا کہ ایسے منصوبے جن کے لیئےکثیر سرمایہ درکار ہوتا ہے ، بالعموم وفاقی یا صوبائی حکومتوں کے تعاون کی ضرورت ہوتی ہے جبکہ سٹی گورنمنٹ کو کوشش کے باوجود یہ تعاون حاصل نہیں ہوسکا ہے۔ ان کا کہناتھا کہ سٹی گورنمنٹ اپنے وسائل کو بہتر ین انداز میں بروئےکار ترقیاتی منصوبوں پر کام کررہی ہے۔