سینٹر ہیلری کلنٹن

شاہد احمد خان ڈیموکریٹک پارٹی میں ایک نمایاں مقام رکھتے ہیں ۔ وہ سینٹر ہیلری کلنٹن کی صدارتی نامزدگی کی مہم کے ایڈوائزرز میں بھی شامل ہیں۔ انھوں نے امریکہ کی موجودہ سیاسی صورتحال کے بارے میں گفتگو کرتے ہوئے کہا کہ ہیلری کلنٹن ابھی تک صدراتی نامزدگی کی دوڑ میں شامل ہیں۔

ڈیموکریٹک پارٹی کی صدارتی نامزدگی جیتنے کے لیے سینیٹر براک اوباما اور سینیٹر ہیلری کلنٹن میں سخت مقابلہ جاری ہے۔ یہ مقابلہ کئی اعتبار سے امریکیوں کے لیے اہم بھی ہے اور دلچسپی کا باعث بھی۔ براک اوباما سفید فام نہیں ہیں اور اگر وہ صدارتی انتخاب کے لیے پارٹی کی جانب سے نامزد کیے جاتے ہیں تو ایسا امریکہ کی سیاسی تاریخ میں پہلی بار ہوگا کہ ایک غیر سفید فام شخص کا انتخاب سب سے بڑے امریکی عہدے کے لیے کیا گیا ہے ۔ دوسری جانب اگر ہیلری کلنٹن وائٹ ہاؤس کے لیے پارٹی کی جانب سے نامزد کی جاتی ہیں تو یہ بھی امریکی تاریخ میں پہلی بارہوگا کہ اس اعلیٰ ترین منصب کے لیے کسی خاتون کا انتخاب کیا گیا ہے۔

میڈیا کی جانب سے ہیلری کلنٹن پر یہ دباؤ بڑھتا جارہا ہے کہ وہ اپنی شکست تسلیم کرتے ہوئے انتخابی دوڑ سے الگ ہوجائیں۔ خاص طور پر کئی ٹیلی وژن شوز اس مہم میں پیش پیش ہیں۔شاہد احمد خان نے اپنے انٹرویو میں کہا ہے کہ ہیلری کلنٹن کسی دباؤ کو قبول نہیں کریں گی اور وہ یہ مقابلہ جاری رکھیں گی۔ انہوں نے اس توقع کا اظہار کیا کہ دیگرریاستوں میں ہونے والی پرائمریز میں ان کی کامیابی کی توقع ہے اور وہ یہ دوڑ جیت لیں گی۔