جیسے جیسے پیٹرول کی قیمتوں میں اضافہ ہورہا ہے ، امریکہ میں چھوٹی گاڑیوں کی فروخت بڑھتی جارہی ہے ۔ ان میں سے اکثر گاڑیوں میں کم ایندھن استعمال کرنے والی جدید ترین ٹیکنالوجی استعمال کی گئی ہے۔ جبکہ بڑی گاڑیوں رکھنے والوں کو یہ امید ہے کہ بالآ خر تیل کی قیمتیں نیچے آجائیں گی۔

بہت سے امریکی یہ آواز بھی اٹھا رہے ہیں اب امریکہ کو اپنے تیل کے ان ذخائر کو استعمال میں لے آنا چاہیے جسے اس نے ہنگامی حالات کے لیے بچا رکھا ہے۔ ان کے خیال میں اس سے زیادہ مشکل وقت اور کیا ہوسکتا ہے۔

تیل کی بڑھتی ہوئی قیمتوں نےامریکیوں کی روزمرہ زندگی کو بری طرح متاثر کیاہے۔ لوگ آنے جانے کے لیے اپنی گاڑی استعمال کرنے کی بجائے اب مل کر سفر کرنے یا متبادل ذرائع استعال کرنے کو ترجیج دینے لگے ہیں۔ تیل کی قمتوں نے مارکیٹ کو بھی بری طرح متاثر کیا ہے۔ اکثر اشیاء کی قیمتوں میں غیر معمولی اضافہ ہوچکاہے اور یہ رجحان جاری ہے جبکہ آمدنی کے ذرائع میں کمی دیکھنے میں آرہی ہے کیونکہ اکثر کاروبار مندی کا شکار ہوچکے ہیں۔