سابق امریکی صدارتی امیدوار جان ایڈورڈز اور سینیٹر براک اوباما

سابق امریکی صدارتی امیدوار جان ایڈورڈ نے ڈیموکریٹک صدارتی نامزدگی کے لیے بارک اوباما کی توثیق کرتے ہوئے کہا ہے کہ اب وقت آگیا ہے کہ پارٹی الی نوائے کے سینیٹر کے ساتھ متحد ہوجائے۔

نارتھ کیرولائنا کے سابق سینیٹر ایڈورڈ نے بدھ کے روز مشی گن میں ایک اجتماع کو بتایا کہ اوباما امریکہ میں ایک دیر پا تبدیلی لاسکتے ہیں۔ انہوں نے اوباما کی حریف سینیٹر ہلیری کلنٹن کی تعریف کی لیکن کہا کہ اب وقت آگیا ہے کہ ڈیموکریٹ ری پبلکن امیدوار جان مک کین کو شکست دینے کے لیے ایک امیدوار کے پیچھے یکجا ہوجائیں۔

بدھ کی صبح کلنٹن نے ویسٹ ورجینیا میں منگل کے پرائمری میں نمایاں کامیابی کے بعد اپنی مہم جاری رکھنے کا عزم ظاہر کیا لیکن ان کی اس جیت سے انہیں اوباما پر سبقت حاصل کرنے میں کوئی خاص کامیابی نہیں ہوئی ہے۔

 ہلیری کلنٹن کو اس جیت سے انہیں نامزدگی کے حصول کے لیے درکار ڈیلی گیٹس کی کل تعداد میں اوباما پر کوئی برتری حاصل نہیں ہوئی ہے۔