مانٹریال، کینڈا میں اقوام متحدہ کی ماحولیات سے متعلق کانفرنس کے مندوبین کے درمیان زمین کے اوزون کے لئے کچھ خطرناک کیمیاوی مادوں کےمرحلہ وار خاتمے پر ایک معاہدہ طے پا گیا ہے۔

معاہدے میں ترقی یافتہ ممالک سے ہائیڈرو کلورو فلورو کاربنز ( ایچ سی ایف سیز)کی پیداوار اور استعمال کو روکنے کی 2030 کی ڈیڈ لائن کو 2020 تک کرنے کے لئے کہا گیا ہے جب کہ ترقی پزیر ملکوں سے 2030 تک اس کی پیروی کے لئے کہا گیا ہے ۔

یہ نیا معاہدہ مانٹریال میں طے پانے والے اس پروٹوکول کی بیسویں سالگرہ کے موقع پر طے پایا ہے جس نے ایچ سی ایف سیز کے استعمال کے خاتمے کے لئے ابتدائی طور پر مقاصد طے کئے تھے۔

ایچ سی ایف سیز کیمیاوی مادے ریفریجریٹرز اور ائیر کنڈیشنرز جیسی مصنوعات میں استعمال ہوتے ہیں۔ یہ مادے زمین کو سورج کی الٹرا وائلٹ شعاعوں سے محفوظ رکھنے والی فضا کی تہہ ، اوزون کو نقصان پہنچاتے ہیں ۔