اقوام متحدہ کی انسانی حقوق کی کونسل نے اس رپورٹ کی توثیق کر دی ہے جس میں اسرائیل اور فلسطینوں پر لگ بھگ ایک سال قبل غزہ کی جنگ کے دوران جنگی جرائم کے الزامات عائد کیے گئے ہیں۔
دو دن کی بحث کے بعد کونسل نے جمعے کے روز جنیوا میں اس رپورٹ کی تائید میں پیش کی جانے والی اس قرار داد کے حق میں ووٹ دیا جو چھ کے مقابلے میں 25 ووٹوں سے منظور ہوئی۔ 11 ملکوں نے ووٹنگ میں حصہ نہیں لیا۔
اقوامِ متحدہ کی اس رپورٹ میں دونوں فریقوں سے کہا ہے کہ وہ چھ ماہ کے اندر جنگی جرائم کے الزامات کی چھان بین کرائیں، ورنہ یہ معاملہ ہیگ میں بین الاقوامی فوج داری عدالت کے سپرد کردیا جائے گا۔
رپورٹ میں یہ بھی کہا گیا ہے کہ اسرائیل گذشتہ دسمبر اور جنوری کی لڑائی کے دوران غیر جنگی لوگوں کے تحفظ کے لیے درکار احتیاطی اقدامات کرنے میں ناکام رہا ہے۔ رپورٹ میں یہ بھی کہا گیاہے کہ حماس نے عام شہریوں کو نقصان پہنچانے کی نیت سے اسرائیل میں راکٹ اور مارٹر گولے داغے تھے۔
اسرائیل اور حماس دونوں جنگی جرائم کے الزامات کی تردید کرتے ہیں۔
