حکمران اتحاد کا اہم اجلاس

آج بدھ کو اسلام آباد میں وزیر اعظم یوسف رضا گیلانی کی صدارت میں اتحادی جماعتوں کے اجلاس میں صوبہ سرحد کے وزیر اعلیٰ کے علاوہ فوج کے سربراہ جنرل اشفاق پرویز کیانی نے بھی شرکت کی۔ انہوں نے شرکا کو وفاق کے زیرِ انتظام قبائیلی علاقوں میں سیکورٹی کی صورتِ حال  اور جاری فوجی کارروائیوں کے بارے میں آگاہ کیا۔ اجلاس میں فاٹا کے سیکریٹری نے بھی بریفنگ دی۔

 اجلاس میں پاکستان پیپلز پارٹی کے شریک چیرمین آصف علی زرداری ، پاکستان مسل لیگ ن کے صدر شہباز شریف، جمیعت علماء اسلام ف کے سربراہ مولانا فضل الرحمٰن اور عوامی نیشنل پارٹی کے لیڈر اسفند یار ولی نے شرکت کی۔

 اجلاس کے بعدجمیعت علماء اسلام ف کے سربراہ مولانا فضل الرحمٰن نے صحافیوں سے باتیں کرتے ہوئے کہا کہ حکومت کو چاہیے کہ وہ عالمی طاقتوں کو یہ باور کرائے کہ ہم اپنی سالمیت پر کوئی سمجھوتہ نہیں کر سکتے۔ عالمی طاقتوں کو اپنے مفادات کے ساتھ ہمارے مفادات کا احترام کرنا چاہیے۔

 واضح رہے کہ یہ اجلاس ایک ایسے موقعے پر ہوا ، جب اگلے ہفتے وزیر اعظم امریکہ کا سرکاری دورہ کرنے والے ہیں اور وہاں امریکی صدر بش اور انتظامیہ کے ساتھ پاکستانی سرحدی علاقے کی سیکورٹی کی صورتِ حال زیرِ بحث آئے گی۔

یاد رہے کہ حزبِ اختلاف کی ایک جماعت مسلم لیگ ق یہ مطالبہ کر رہی ہے کہ وزیر اعظم کے امریکی دورے سے قبل پارلیمنٹ کا ایک مشترکہ اجلاس بلاکر متفقہ پالیسی وضع کی جائے اور یہی پالیس وزیر اعظم کو امریکی قیادت کے سامنے پیش کی ضرورت ہے۔ لیکن حکومت نے اس سلسلے میں صرف اپنی اتحادی جماعتوں سے مشاورت پر اکتفا کیا ہے۔