AQSh prezidenti Barak Obama NATOni kuchaytirishga yordam bermoqchi. U kelasi hafta tashkilotning 60 yilligini nishonlash uchun Yevropaga yo'l oladi. Alyans Afg'onistonda faolroq harakat qilishi kerak, deydi Obama.

NATO tantanalari Fransiya va Germaniyada o'tadi. Prezident Obamaga ko'ra, bu bilan bog'liq turli uchrashuvlarda NATOning o'tmishdagi faoliyati sarhisob qilinib, kelajagi muhokama etiladi.

"NATO oldida qator dolzarb muammolar turiibdi: terrorizm, jar yoqasida turgan davlatlar, yadro qurollarining tarqalish ehtimoli. Tahdidlarning ba'zilari yangi. Alyans ularni hal qilish uchun ish uslubini o'zgartirishi kerak," - dedi Obama kecha Oq Uyda NATO Bosh kotibi Yap de Xup Sxeffer bilan uchrashuvdan so'ng.

Obamaning aytishicha, Afg'oniston bo'yicha yangi strategiya deyarli tayyor. Ba'zi manbalarga ko'ra, hujjatning bir qismi ertaga e'lon qilinishi mumkin. NATO sammiti davomida esa ittifoqchilar strategiya bilan yaqindan tanishadi.

"NATO a'zolari ko'p ter to'kkan. Strategiyada Afg'onistondagi missiyani muvaffaqiyatli yakunlash uchun alyans ishini muvofiqlashtirish ko'zda tutilgan",- deydi Obama.

"Rossiya bilan aloqalarni yaxshilash o'ta muhim, ammo NATO talablariga javob bergan va unga a'zo bo'lishga istak bildirgan davlatga "yo'q" deya olmaymiz",- deydi Obama. Ma'lumki, Rossiya NATOning uning chegaralari tomon kengayishiga qarshi.

NATO rahbarining aytishicha, alyans Rossiyaga, Rossiya esa NATOga kerak.

"Umumiy manfaatli sohalarda hamkorlik qilish zarur. Kelishmovchiliklarni esa muhokama qilish lozim, shundagina munosabatlarimiz kuchayadi" ,- deydi iyul oyida vakolati tugayotgan Sxeffer.