Nuri Turkel fikricha Guantanamoda ozodlik kutib o'tirgan uyg'urlar Amerikaga hech qachon hech qanday tahdid solmagan va solmaydi ham

AQSh rahbari Barak Obama davlat xavfsizligi haqida so'zlar ekan, terror guruhlari hamon tahdid solmoqda deya qayd etdi. 

"Ularga qarshi kurashda AQSh insoniy qadriyatlardan voz kechmaydi va erkinlikni e'zozlashda davom etamiz",- deydi Obama. 

Prezidentning aytishicha Guantanamoda o'tirgan ayrim mahbuslarning begunoh ekani isbotlangan. Ammo ularni ozodlikka chiqarish qiyin kechmoqda. 

Guantanamodagi 240 asirdan 17 nafari uyg'ur bo'lib, ularning advokatlari bu insonlarga AQShda boshpana berilishini so'ramoqda.

Nuri Turkel, Vashingtonda faoliyat yurituvchi uyg'ur huquqshunos bu masala bilan yaqindan tanish. Bu hafta Jahon Uyg'urlari Kengashi AQSh poytaxtida yig'ilmoqda. "Amerika Ovozi" Nuri Turkel bilan suhbatda bo'ldi.