ဘရာဇီးလ်ရေဘေးဒုစရိုက်မှု ရဲရေလျှပ်ပြေးယာဉ်များ ကင်းလှည့်

သီတင်း ၂ ပတ်ကြာ မိုးသည်းထန်ပြီး ရေဘေးသင့်နေတဲ့ ဘရာဇီးလ်နိုင်ငံတောင်ပိုင်း ရီယို ဂရမ်ဒူဆူလ်ပြည်နယ်မှာ မိုးတွေထပ်ရွာသွန်း၊ အခြေအနေ ပိုဆိုးပြီး ဒုစရိုက်မှုတွေလည်း ပိုတိုးလာနေပါတယ်။ မြစ်တွေရေလျှံလို့ မြို့တွေရေဖုံးပြီး သေဆုံးသူ အယောက် ၁၅၀ နားကပ်နေသလို၊ လူ ၂ သန်းကျော် ရေဘေးဒုက္ခနဲ့ တွေ့ကြုံနေရပါတယ်။ ဒီနှစ်ကြုံရတဲ့ အယ်လ်နီညို ရာသီဥတု ပုံစံကြောင့် အပူလှိုင်းဖြစ်ပေါ်ချိန်မှာ အန္တာတိကဒေသက လေအေးစီးကြောင်းရယ်၊ အတ္တလန္တိတ်သမုဒ္ဒရာက ထူးကဲတဲ့ စိုထိုင်းမှုရယ်ကြောင့် မိုးကြီးတာဖြစ်တယ်လို့ ကျွမ်းကျင်သူတွေက ပြောပါတယ်။